“Монголын хөрөнгийн бирж” ХК-ийн уул уурхайн бүтээгдэхүүний арилжааг хөгжүүлэх ажлын хүрээнд бүтээгдэхүүнийг худалдан авагч талд гэрээний хугацаанд нийлүүлэх үйл явц, цахим арилжаанд үүсч болзошгүй эрсдэлээс урьдчилан сэргийлэх, уул уурхайн бүтээгдэхүүний арилжааг тогтвортой, ил тод зохион байгуулахтай холбоотойгоор оролцогч талуудын үйл ажиллагаатай танилцаж, санал, сэтгэгдэл солилцох зорилгоор томилолтын баг 2024 оны наймдугаар сарын 7-ноос 10-ны өдрийг хүртэл орон нутаг, хилийн боомтод ажиллалаа. 

Энэ хүрээнд биржид бүртгэлтэй Өмнөговь аймгийн Цогтцэций сумын нутаг дэвсгэрт уул уурхайн чиглэлээр үйл ажиллагаа явуулдаг компаниудын бүтээн байгуулалт, Гашуунсухайт-Ганцмод Хилийн боомтын захиргаа, чингэлэгт тээврийн терминалын үйл ажиллагаатай танилцаж, “Эрдэнэс Тавантолгой” ХК,  “Энержи ресурс” ХХК болон Гашуунсухайт-Ганцмод хилийн бүсчлэл, гаалийн хяналтын талбайд ажиллан, биржийн зах зээлд оролцогч байгууллагуудын хоорондын харилцаа холбоог сайжруулах, биржээр арилжаалагдаж буй нүүрсний борлуулалт, тээвэрлэлтэд гарч буй хүндрэлийг хэрхэн зохицуулж, шийдвэрлэх талаар харилцан мэдээлэл солилцсон.    

Түүнчлэн Шанхайн хөрөнгийн биржид бүртгэлтэй уул уурхайн бүтээгдэхүүний тээвэр логистик, агуулахын чиглэлээр үйл ажиллагаа явуулдаг Jia You International компанийн үйл ажиллагаатай танилцаж, тус компаниас нүүрс тээвэрлэлт, агуулах, терминалийн үйл ажиллагааг түргэн шуурхай гүйцэтгэх чиглэлд хамтарч ажиллах боломжийн талаар танилцуулга мэдээлэл өглөө.  

МОНГОЛЫН ХӨРӨНГИЙН БИРЖ