Монгол улсын Ерөнхий сайд С.Батболдын урилгаар Кентийн эрхэм дээд хунтайж Майкл манай улсад айлчлахаар 2012 оны дөрөвдүгээр сарын 14-нд Улаанбаатар хотноо ирсэн билээ. Тэрбээр Их Британийн хатан хааны үеэл бөгөөд гадаадын улс орнуудад Хатан хааны элч төлөөлөгчөөр ажилладаг аж. Эрхэм дээд хунтайж Майкл айлчлалынхаа хугацаанд Монгол улсын Ерөнхий сайдад бараалхаж, мөн зарим салбарын сайдуудтай уулзан хоёр талын худалдаа, хөрөнгө оруулалт, эдийн засгийн хамтын ажиллагааны асуудлаар санал солилцсон байна.
Тэрбээр айлчлалын хүрээнд өнөөдөр буюу 2012.04.16-ны Даваа гарагт Монголын хөрөнгийн бирж /МХБ/-д зочилж үнэт цаасны арилжааг нээн цан цохихын зэрэгцээ хөрөнгийн зах зээлийн шинэчлэлийн ажлын явцтай танилцаж, холбогдох албаны хүмүүстэй уулзалт хийсэн байна. Уулзалтанд МХБ-ийн гүйцэтгэх захирал Х.Алтай, СЗХ-ны дарга Д.Баярсайхан, дэд дарга Б.Даажамба, ҮЦТТТХТ-ийн гүйцэтгэх захирал Т.Гандулам болон холбогдох байгууллагуудын удирдах албан тушаалтнууд оролцсон байна. Кентийн эрхэм дээд хунтайж Майкл Монгол улсад дөрөв хоног айлчлах бөгөөд түүнийг дагалдан Их Британи, Монголын худалдааны танхимын дарга Жон Гроган болон банк санхүү, үл хөдлөх хөрөнгө, боловсролын салбарын томоохон компаниудын төлөөлөгчид ирсэн байна.
