Үнэт цаасны зах зээлийн мэргэжлийн оролцогчид, үнэт цаас гаргагч аж ахуйн нэгжүүд, хөрөнгө оруулагчид, иргэд Та бүхэндээ айлчлан ирж буй 2020 ондоо ололт амжилтаар дүүрэн байхыг ерөөж, шинэ жилийн мэнд дэвшүүлье!

“Монголын хөрөнгийн бирж" ТӨХК болон хөрөнгийн зах зээлийн хувьд 2019 он амжилт, ололтуудаа бататгасан жил байлаа. Энэ онд нийт арилжааны үнийн дүн 143 тэрбум төгрөгт хүрснээс гадна 4 компани үнэт цаасаа шинээр гаргаж, 42.4 тэрбум төгрөгийг татан төвлөрүүлсэн нь Монголын хөрөнгийн зах зээлийн 29 жилийн түүхэн дэх анхдагч зах зээлийн арилжааны хамгийн өндөр дүн байлаа. Мөн хөрөнгийн зах зээлд нэн шаардлагатай байгаа гадаадын мэргэжлийн хөрөнгө оруулагчдыг төлөөлөл болох Солонгос улсын Райнос Эссет Менежмент компани Монгол улсад өөрийн салбар "Райнос Эссет Менежмент Монгол" компаниа нээж МХБ-ийн бүртгэлтэй компаниудад хөрөнгө оруулж эхлээд байгаа бол дотоодын сангуудыг бий болгох зорилгоор МХБ нь “Хаалттай хамтын сангийн нэгж эрхийг бүртгэлийн журам”-ыг санаачлан батлуулж сангийн нэгж эрхийг бүртгэн, арилжаалах эрх зүйн орчинг бүрдүүлээд байна.

Түүнчлэн, хөрөнгийн зах зээлийн талаарх иргэд, олон нийтийн мэдлэг, мэдээллийг нэмэгдүүлэх зорилгоор 10 аймаг 6 суманд “Үнэт цаасны зах зээлийн нээлттэй өдөрлөг” арга хэмжээг зохион байгуулснаас гадна уг үйл ажиллагааны нэг хэсэг болох хөрөнгийн зах зээлийн суурь мэдлэг олгох сургалтыг “Эрдэнэс таван толгой” ХК-тай хамтран 21 аймаг 330 сумын 54,000 гаруй иргэдэд явуулсан зэрэг ололт амжилттайгаар 2019 оноо үдэж байна.

Бид 2020 онд амжилтын буухиагаа үргэлжлүүлж, дотоодын мэргэжлийн хөрөнгө оруулагчдыг бий болгоход онцгойлон анхаарч тэтгэврийн тогтолцооны шинэчлэл, хөрөнгө оруулалтын сангийн эрх зүйн орчны шинэчлэл зэрэгт манлайлж оролцохоос гадна зах зээл дэх шинэ бүтээгдэхүүн үйлчилгээ, тухайлбал хөрөнгөөр баталгаажсан үнэт цаасыг бүртгэн зах зээлд гаргах, Монгол улсын 2.5 сая иргэний эзэмшиж байгаа “Эрдэнэс тавантолгой” ХК-ийн хувьцааг бүртгэн арилжаалах зэрэг ажлуудыг амжилттай хэрэгжүүлж, зах зээлийн идэвх, хөрвөх чадварыг нэмэгдүүлэхэд анхааран ажиллах болно.

Та бүхэндээ шинэ оны мэнд дэвшүүлэхийн хамтад ирж буй 2020 ондоо амжилт бүтээлээр арвин байхыг хүсэн ерөөе.

МОНГОЛЫН ХӨРӨНГИЙН БИРЖ